Gömrük Komitəsindən açıqlama - Sərhəddəki sıxlığın səbəbi

Bölmə: Siyasət

08 iyul 2016 15:02 Baxış: 303 Şərh: 0 Çap

Dövlət Gömrük Komitəsi Azərbaycan-Gürcüstan sərhədindəki sıxlıqla bağlı açıqlama yayıb.

Xalqinfo.az “Qafqazinfo”ya istinadən bildirir ki, komitədən bildirilib ki, iyul ayının 6-da səhər saatlarından etibarən Azərbaycan-Gürcüstan sərhədində yerləşən “Sınıq Körpü” gömrük keçid məntəqəsində nisbi sıxlıq yaranıb.

Sıxlığın yaranmasının əsas səbəbi bayram günləri ilə əlaqədar Gürcüstan Respublikasına səyahət edənlərin sayının kəskin artmasıdır. Gömrük keçid məntəqəsinin iş rejimini çətinləşdirən digər amil isə Rusiya-Gürcüstan sərhədində baş verən uçqun nəticəsində Rusiyadan bu ölkəyə gedən avtomobillərin Rusiya-Azərbaycan-Gürcüstan marşrutu ilə hərəkət etməsi olub. Belə ki, Rusiya-Gürcüstan arasındakı sərhəd-keçid məntəqəsinin iş rejimində yaranan problem nəticəsində Rusiya Federasiyasından Gürcüstana gedən avtomobillər Azərbaycandan tranzit keçməklə “Sınıq Körpü” gömrük keçid məntəqəsi vasitəsilə Gürcüstan ərazisinə hərəkət edir.

3 xətt vasitəsilə avtomobillərin intensiv keçidinin təmin olunduğu “Sınıq Körpü” gömrük keçid məntəqəsi gücləndirilmiş iş rejimində fəaliyyət göstərir və iyulun 7-də səhər saatlarına qədər gömrük keçid məntəqəsindəki sıxlıq tam aradan qaldırılıb.

İyulun 7-də günortaya doğru isə “Sınıq Körpü” sərhəd buraxılış məntəqəsinin qarşısında yenidən avtomobillərinin sıxlığı müşahidə olunmağa başlayıb. Buraxılış məntəqəsindəki vəziyyətlə əlaqədar jurnalistlərə müsahibə verən sürücülər isə problemin yaranmasında əsasən “Sınıq Körpü” gömrük postunun əməkdaşlarını, yəni gömrük orqanlarını günahlandırıb.

Bununla əlaqədar Dövlət Gömrük Komitəsi bir daha bildirir ki, sərhəd buraxılış məntəqəsinin qarşısındakı sıxlıq gömrük orqanlarının fəaliyyəti və ya fəaliyyətsizliyi səbəbilə yaranmayıb. Belə ki, “Sınıq Körpü” gömrük postunun ixrac nəzarət xəttindən iyul ayının 6-da 874 ədəd minik və 263 ədəd yük, iyul ayının 7-də isə 805 ədəd minik və 180 ədəd yük avtomobilinin keçidi təmin olunub. Bu da təqribən 2 dəqiqədən az vaxta bir minik, 10 dəqiqədən az vaxta isə bir yük avtomobilinin keçidi deməkdir.

Müvafiq gömrük prosedurlarının və yoxlamalarının yubadılması barədəki iddialara gəlincə isə avtomobillərin və sərnişinlərin sərhəd buraxılış məntəqəsinin və gömrük zonasının ərazisinə giriş-çıxış vaxtları, eyni zamanda məntəqənin daxilində həyata keçirilən prosedurlar kameralar vasitəsilə qeydə alınır. Dövlət Gömrük Komitəsinin tətbiq etdiyi və beynəlxalq təcrübəyə əsaslanan qaydalara əsasən yük avtomobilinin müvafiq gömrük yoxlama və prosedurlarından keçirilərək yola salınması maksimum 20 dəqiqə ərzində təmin olunur.

Hal-hazırda problem tam aradan qaldırılıb və “Sınıq Körpü” gömrük keçid məntəqəsində heç bir sıxlıq müşahidə olunmur.

Kainat Şirin

Xalqinfo.az

Şərh Yaz