"Səninçün ən dəcəl uşaq olmuşam"- Nüsrət Kəsəmənli
13 dekabr 2016 16:07
Baxış: 546
Şərh: 0
Çap
Xalqinfo.az bildirir ki ,Nüsrət Kəsəmənlinin 70 illik yubileyi ilə əlaqədar tədbir keçiriləcək. Bakı Şəhər Mədəniyyət və Turizm Baş İdarəsinin təşkilatçılığı ilə şair-publisist Nüsrət Kəsəmənlinin 70 illik yubileyi ilə əlaqədar tədbir keçiriləcək. Bu haqda "Trend" agentliyi məlumat verir.
İdarədən verilən məlumata görə, yazıçı Aqil Abbas, şairlər Musa Yaqub, Baba Vəziroğlu, xalq artistləri Nurəddin Mehdixanlı, Nazpəri Dostəliyeva, bəstəkar Cabbar Musayev və başqa mədəniyyət və incəsənət xadimləri iştirak edəcəklər.
Tədbir dekabrın 15-də, saat 14:00-da Zirə Eko Parkda baş tutacaq. Xalqinfo.az Nüsrət Kəsəmənlinin Şeçilmiş şeirlərinin bezilerini teqdim edir/ Sən demə təzədən sevmək olarmış...
Sən demə təzədən sevmək olarmış, Tale də təzədən gülə bilərmiş, Küsüb gözüyaşlı gedən məhəbbət Peşiman-peşiman dönə bilərmiş.
Ürək bulud kimi boşalırsa da Demək bulud kimi təzədən dolur. Sonuncu şöləsi titrəyən şamdan Ayrı bir şamı da yandırmaq olur.
Sən demə təzədən sevmək olarmış, Köhnə yaraları vaxt, zaman silir, Kəsilən budaqla ölən ağaclar Təzə pöhrələrlə dirilə bilir.
Ağlaya-ağlaya dünyaya gəlib Biz ana südüylə gülməmişikmi?! Hər axşam sapsarı batan günəşi Hər səhər təzə-tər görməmişikmi?
Sən demə təzədən sevmək olarmış, Sevgi fürsət deyil quş kimi uça. Nə də kölgədir ki, Qaçasan qova, Ya da sən qovasan O səndən qaça...
Çıxarsan qəlbindən ötən sevgini, Bir gün də tənhalıq sıxacaq səni. Kiməsə etdiyin yaxşılıq kimi Məhəbbət qarşına çıxacaq sənin.
İlk sevgi yuvadan düşən quşcuğaz, Körpə qanadları pöhrələnməyib. Məcnunun ahıyla uçan məhəbbət Min hiylə əliylə yerə enməyib...
Mən ki görməmişəm sevgini susan, Məhəbbət zirvədə bəslənən qarmış. Kim deyir bir dəfə sevilir insan, Sən demə hər zaman sevmək olarmış... Nə biləydik...
Nə biləydik bu sevginin sonu yox, Nə biləydik dünya belə dönəcək. Nə biləydik sevgi adlı bu qonaq İkimizin aramızda öləcək...
Ulu sevgi göydən yerə endimi, Nə dayandı yolumuzun üstündə? Bu məhəbbət soyuduqca sən demə Can verərmiş qolumuzun üstündə.
Hər görüşə sürünürdü ayaqlar... O çəmənlər – bir baharlıq səməni. Dodaqları yandıranda dodaqlar Ürəyimiz üşüyürmüş deməli.
Əyləncələr qoymadı ki göz açaq; Hər istəyi biz beləcə bitirdik. Payız gəldi toy-bayramla, biz ancaq Yarpaq-yarpaq günümüzü itirdik.
Şirin oldu yalanların zəhəri, Həqiqəti gizləmişik həmişə. Sevgililər oyaq açdı səhəri. Biz axşamı gözləmişik həmişə...
Yuxu gördük... gah qorxulu, gah da şən, Boğdu bizi tərəddüdülər axarı. Yuxularda əllər gördük birləşən, Nə yozduqsa hicran oldu axırı...
Nə biləydik bu sevginin sonu yox, Nə biləydik dünya belə dönəcək. Nə biləydik sevgi adlı bu qonaq Üzümüzə baxa-baxa öləcək...
Etiraf
Ömür-gün yoldaşıma
Fikirli gəlirəm, dalğın gəlirəm, Qayğılı gözlərin çəkir şəklimi. Bəzən gec gəlirəm, yorğun gəlirəm Bitirsən qapıda bənövşə kimi...
Bəlkə min suçumu bilmisən mənim, Birini üzümə vurmamısan heç. Eyhamla üzümə gülmüsən mənim, Birce yol üzümə durmamısan heç.
Hər kəs taleyile gəlir həyata, Demirəm, ürəyi yumşaq olmuşam. Dəcəl uşaqlara mülayim ata, Səninçün ən dəcəl uşaq olmuşam.
Sənsən dağlar kimi səbrlə dözən Bəlkə tərəddüdlə çox döyüşmüsen. İsti bir sevgiden yazmişam bəzən, Soyumuş çayımı sən dəyişmisən...
Üzümdə kədərdən bir iz görəndə, Şirinim olmusan, acım olmusan. Qohumdan, tanışdan pis üz görəndə Sən anam olmusan, bacim olmusan.
Bir kövrək şeirimdən gözlərin dolub, Nə deyim, özgədən çox yazıb qələm. Nə qədər düyünlü günümüz olub, Düyünlü qaşını görməmişəm mən...
Bir əlin mətbəxdə qabda-qaşıqda, Bir gözün istide, tüstüdə olub. Bir əlin beşikdə oğul-uşaqda, Bir gözün həmişə üstümdə olub.
Yollar çarpaz-çarpaz, yollar qarışıq... Gecə yol gedirəm qulağı səsdə. Bizim pəncərədən süzülən ışıq- Gözümün nurudur yolumun üstə.
Fikirli gəlirəm, dalğın gəlirəm, Qayğılı gözlərin çəkir şəklimi. Bəzən gec gəlirəm, yorğun gəlirəm Bitirsən qapıda bənövşə kimi...
Əllərin nə yaman soyuqdur, gülüm...
Əllərin nə yaman soyuqdur, gülüm, Əllərin elə bil qar çiçəyidir. Ay aman, əlində dondu ki əlim, Əllərin əlimin buz əlcəyidir. Biz ki cənubluyuq, bu soyuq hardan? Gərək külümüz də soyuq olmasın. Gözümüz dünyada ən qaynar bulaq, Gərək əlimiz də soyuq olmasın.
Oddan yoğrulmuşuq, atəşik axı, Qəlbimiz duyğular tonqalı kimi. Yanağın elə bil alov dilmi, İllərin bir taxta yonqarı kimi... Əllərin nə yaman soyuqdur, gülüm, Niyə bu soyuğu indi duymuşam? Bir ömrün məhəbbət taleyini mən O soyuq əllərə necə qıymışam?!
Ay üzübaharlı, əli qış sonam, Gileyim gülməli gəlməsin mənim. Qorxuram sevgidə soyumağın da Əlindən başlaya, əlindən sənin; Əllərin nə yaman soyuqdur, gülüm...
|