Səməd Səmədov: "O vaxtın 3 mini bu günün 25 minidir"

Bölmə: Şou, SÖHBƏT

03 oktyabr 2014 10:48 Baxış: 519 Şərh: 0 Çap

Səməd Səmədov: "O vaxtın 3 mini bu günün 25 minidir"

"İndi artıq dəbdə olan sənətçilər var. Onların kimliyini siz də bilirsiniz. Onlar olan yerdə bizi toya aparan yoxdur”.

Bunu xalq artisti, "Toylar kralı” Səməd Səmədov müsahibəsində bildirib. Xalq artistinin sözlərinə görə, onu toya çağıranlar ancaq sadə və kasıb vətəndaşlardır. "Onların arasında olmağı sevirəm. Buna da min şükür. Xalqıma təşəkkürümü bildirirəm. Sağ olsunlar ki, onlar məni unutmur, öz şənliklərinə dəvət edirlər”.

Səməd Səmədov müsahibəsində indiyədək oxuculara məlum olmayan bir çox məqamlara toxunub.

-Səməd müəllim, yeni mövsüm başlayıb. Bu payızda tamaşaçılara hansı yeniliklər bəxş edəcəksiniz?

-Mən hələ bağda dincəlirəm. Havalar qaydasına düşməyincə şəhərə daşınmıram. Çünki payızın havası bağda adama ləzzət verir. Mən burada tək deyiləm, dayanmadan yanıma tanışlarım gəlir. Onların arasında "Qismət” qrupu da var. Qrupla məşğul oluruq. Bizim yeni bir disk buraxmaq fikrimiz var. Məhərrəmliyə də az qalıb. Bu da o deməkdir ki, toy mövsümü bağlanır. Çox pis oldu. Hər halda çətin aydır. Səhərlər qaçıram, artıq pensiyadayam. Yəni, belə desək, pensiyaçıyam. İnanırsınız, bu, mənim heç xoşuma getmir. Səməd Səmədov da pensiyaçı oldu...

-Hələ sizin pensiya çıxmağınıza çox var axı?

-Asta-asta pensiyaya doğru gedirəm. Bunu bilib, mən də bala-bala, asta-asta işləyirəm. Yaxşı olacaq, inşallah. Nəvələrimi başıma yığmışam. Artıq onların hər biri məktəbə gedir. Böyük nəvəmin oktyabrda 17 yaşı tamam olacaq. O gün olsun, nəvə toyu görüm. Mənim yaşıdımda kimlər var, hamısına nəvə toyu arzu edirəm.

-Yeni mövsümdə solo konsertiniz olacaq?

-Mənim üçün konsert bitib. Mən heç cavanlıqda bir dəfə də olsun, konsert vermədim. Bundan sonra isə konsert heç olmayacaq. Cavanlıq gedib, konsert vaxtı deyil. Səməd Səmədovun konsertləri - onun apardığı toy şənlikləridir. Mənim kimi toy aparan, toy oxuyan var ki? Maşallah, ömrümün 25 ilini xalqın toy şənliyinə sərf elədim. Toylar məni qocaltdı. Mən kimlərin toyunda olmamışam... Bu gün mən vaxtıyla toy oxuduğum bəylə gəlinin nəvələrinin toyuna gedirəm. Yaxınlaşırlar mənə, deyirlər ki, Səməd müəllim baxın, siz vaxti ilə bizə toy etdiniz, indi bizim övladlarımızın toyuna gəlmisiniz. Artıq nəvə toyu edirəm.

-Bu illər ərzində ən bahalı toyu kimə etmisiniz?

-O vaxtlar toyların qiyməti 3 mindən çox deyildi. Bugünkü kimi bahalı toy yox idi. Ən bahalı toy 5 min idi. Yəni, nəinki mən, rəhmətlik Məmmədbağır Bağırzadə, Zaur Rzayev, Hüseynağa Hadıyev, Yalçın Rzazadə, Akif İslamzadə bahalı toylara gedirdik. O vaxtlar bu tərkib ən bahalı toyun aparıcıları idi. Əgər mənə inanmırsınızsa, Əli Mirəliyevdən soruşun. Əli Mirəliyev bunların canlı şahididir. O vaxtın 3 mini bu günün 25 minidir. Mən belə düşünürəm.

-Sənət adamlarına bahalı hədiyyələr bağışlayırlar. Sizə ən bahalı hədiyyə nə olub?

-Mənə ən böyük hədiyyə Əməkdar artist və Xalq artisti fəxri adlarıdır. Bundan böyük bahalı hədiyyə ola bilməz. Bu, hər sənətkara nəsib olmur. Baxın da, mən çox xoşbəxt sənətkaram ki, bu böyük hədiyyəni dövlətdən və Prezidentdən aldım. Ona görə də sayılıram, hörmətim var.

-Məmur balalarının toyunda oxumusunuz?

-Əlbəttə. İnanmırsınızsa bunu da Əli Mirəliyevdən soruşun. Mən vaxtiylə ən bərk gedən müğənni olmuşam.

-Bəs, bu gün necə, məmur balalarının toyuna dəvət alırsınız?

-Yox. Bu gün məni toya aparan məmur yoxdur.

-Səbəb nədir?

-İndi artıq dəbdə olan sənətçilər var. Onların kimliyini siz də bilirsiniz. Onlar olan yerdə bizi toya aparan yoxdur.

-Bəs, sizi toya aparan kimlərdir?

-Ancaq sadə və kasıb vətəndaşlar. Onların arasında olmağı sevirəm. Buna da min şükür. Xalqıma təşəkkürümü bildirirəm. Sağ olsunlar ki, onlar məni unutmur, öz şənliklərinə dəvət edirlər. Bu gün müğənnilər toy qiymətlərini açıqlamaq istəmirlər. Gizlədirlər, amma Səməd Səmədov həmişə hamıdan fərqlənib. Odur ki, mən çəkinmədən bu gün toya neçəyə getdiyimi də deyə bilərəm. Toyum var ki, 4 mindir. Toy da var 3 min, 2 min 500 və 2 min manatdır. Bu, toyun harada keçirilməsindən asılıdır. Elə şadlıq sarayları var ki, orada toy 4 mindir. Yəni istəsəm də aşağı edə bilmirəm. Eləsi də var ki, 2 mindir. Utanmadan deyirəm. Nədir ki, Səməd Səmədov 2 minə toya gedə bilməz?

Şərh Yaz