» » Elza necə münsif olub? - “... Başımızı həkimə göstərməliyik”

Elza necə münsif olub? - “... Başımızı həkimə göstərməliyik”

Bölmə: Şou, BLOK XƏBƏR, MANŞET
Elza necə münsif olub? - “... Başımızı həkimə göstərməliyik”
ARB telekanalında yayımlanacaq "Xalqın şairi" verilişinin anonsu qalmaqala səbəb olub. “Xalqinfo” xəbər verir ki, buna səbəb münsif kürsüsündə tez-tez şeirləri ilə gündəmə gələn əməkdar artist Elza Seyidcahanın yer almasıdır.

Maraqlıdır ki, ədəbiyyatın siması kimi verilişin şapkasında Məhəmməd Füzuli, Səməd Vurğun, Mikayıl Müşfiq, Bəxtiyar Vahabzadə, Hüseyn Cavid, İmadəddin Nəsimi kimi söz ustadlarının portretləri yayımlansa da, şeirə qiymət vermək üçün Elza Seyidcahanı seçiblər. Layihənin müəllifi də təcrübəli jurnalist ANS-in “Qulp” verilişinin siması Mübariz Əsgərovdur.

Elza necə münsif olub? - “... Başımızı həkimə göstərməliyik”

Bəs Elza ilə eyni masanı paylaşan qələm adamları bu barədə nə düşünür?

Əməkdar incəsənət xadimi, şair Baba Vəziroğlu proqramda əsas söz sahiblərinin onunla Qulu Ağsəsin olduğunu qeyd edib:

“Münsifləri TV və layihə rəhbəri seçib. Belə bir məşhur məsəl var: “Hər qoyunu öz ayağından asırsan”. Hər kəs özünə cavabdehdir. Amma ümumi məqsəd var. Gənc yazarlara dəstək, istedadlıların tanınması və sonda 5 iştirakçının kitabı çıxacaq. Sosial şəbəkələrdə hər kəs fikrini bildirə bilər. Normal haldır. Məni, Elzanı bəyənib-bəyənməyənlər ola bilər. Xeyirxah işdir, bunun naminə dözmək olar. Düşünürəm ki, münsiflər heyəti arasında ayrıseçkilik etmək düzgün deyil. Hamı bir məqsədə xidmət edir. Elza xanım öz tərzindən kənara çıxmır. Yarışmada o poeziyanın dərinliklərinə varmır. İstedadlı gənclərə “yox” demir, əksinə hamıya yaşıl işıq yandırır. Əsas söz sahibləri mən və Qulu Ağsəsdir. Bizim də məqsədimiz istedadlı gəncləri finala çıxarmaqdır. Televiziyanın da müəyyən qaydaları var, şou elementləri qatmalıdır. Verilişi elə təqdim etməlidirlər ki, hamı baxsın. Quru-quru şeir desələr heç kəs baxmaz. Poeziya ağır yemdir. Bu ciddi ədəbiyyəti qəşəng parıltılı konfet kağızına büküb camaata təqdim edirlər”.

Qulu Ağsəs Seyidcahanın verilişdə bəstəkar kimi təmsil olunduğunu deyib:

“Demək olar ki, gün ərzində müxtəlif jurnalistlər, dostlar, tanışlar tərəfindən ünvanlanmış məhz bu sualı cavablandırmışam. Dəfələrlə televiziyaların ədəbiyyata yer ayırmamasından gileylənmişəm. Aylar əvvəl ARB kanalından zəng edib belə bir layihə etmək istədiklərini deyəndə sevindim və məmnuniyyətlə razılaşdım. Bir neçə gün qabaq isə zəng vurub sınaq çəkilişlərinə dəvət etdilər. Mən oraya gedəndə Baba Vəziroğlunu, Aşıq Əhlimanı, Elza Seyidcahanı gördüm. Mənə dedilər ki, münsiflər heyətində rəngarənglik olsun deyə aşıq da dəvət olunub, bəstəkar da. Yazıçı və şair kimi Baba Vəziroğlu, mən isə redaktor-şair kimi. Kiminsə şeiri xoşuna gəlsə, Elza xanım mahnı bəstələyəcək. Münsifləri ilk dəfə elə sınaq çəkilişində görmüşəm. Cəmi 3 sınaq çəkilişi olub. Bütün layihə, gələcəyi, mükafatar bir yana qalıb, təəssüflər olsun ki, hamı Elzanın oraya niyə qatılmasından danışır. Elza xanım müsabiqəyə bəstəkar kimi qatılıb, şair kimi yox. Gələcəkdə başqa tanınmış adamların da qatılması gözlənilir, ola bilsin ki, münsiflər heyətində müğənnilər də olsun”.

Yazar Şərif Ağayar baş verənlərə heç də təəccüblənməyib: “Guya, efirimizdə hər şey öz yerindədir, bircə qalıb Elza xanımın münsif olması? Məncə, bizim üçün adi hadisədir. Qeyri-adi heç nə görmürəm”.

Şair Aqşin Yenisey də Elzanın münsif olmasına təbii baxıb: “Bu müsabiqə adi bir teleşoudur, şonunun münsiflər heytində hansısa müğənninin oturmasında təbii heç nə yoxdur. Yox, əgər biz bu müsabiqənin nəticələrindən Nobel mükafatı gözləyiriksə, başımızı həkimə göstərməliyik. Qaldı ki, bu şouya Nəsiminin, Hüseyn Cavidin, Sabirin imzası altında başlamaq məsələsinə, Azərbaycanda satılması nəzərdə tutulmayan heç bir dəyər qalmayıb artıq”.

Elza necə münsif olub? - “... Başımızı həkimə göstərməliyik”

ARB Media Qrupun Strateji inkisaf, Marketinq və Media direktoru İsmayıl Həsənov Elzanın münsif qismində iştirakında qəbahətli heç bir nüansın olmadığını qeyd edib.

“Əvvala onu qeyd edim ki, Elza xanım müsabiqədə şairə kimi deyil, bəstəkar kimi təmsil olunur. Biz çalışmışıq ki, Azərbaycan poeziyasının bütün çalarları bu müsabiqədə təmsil olunsun. Müsabiqədə Baba Vəziroğlu, Aşıq Əhliman, Qulu Ağsəs kimi sənətdə öz sözünü demiş şəxslər də təmsil olunacaq. İstər dünya, istərsə də yerli televiziya praktikamızda bu kimi hallar olub. Qardaş Türkiyə televiziyalarında da hansısa bir yarışmada fərqli janrın nümayəndəsi münsif kimi əyləşib, prodüser, şoumen, aparıcı və s. qismində. Bu bir televiziya layihəsidir, məhsulun geniş tamaşaçı auditoriyası tərəfindən sevilməsi, hər kəsin özünə uyğun bir elementi bəyənməsi üçün bu hal normal qəbul olunmalıdır. Müsabiqədə oxunan şeirlərin bəzilərinin musiqi ilə uyğunluğu da sınaqdan keçiriləcək, Elza xanımın münsif qismində iştirakında qəbahətli heç bir nüans yoxdur. O, proqrama digər şou biznes nümayəndələri də qonaq qismində qatılacaq, bu isə teleproqramın daha baxımlı olmasına gətirib çıxaracaq və iştirakçı olan şəxslərin istedadları daha böyük kütləyə çatdırılacaq”.

Elza Seyidcahan özü də məsələyə münasibət bildirib: “Artıq layihəyə start verilib, seçimlər edirik. “Xalqın şairi”ndə bir-birindən istedadlı insanlar münsifdir. Mənim “Get işinlə məşğul ol”, “Zad qalmışam” şeirlərim var. Məni tənqid edənlərə bu şeirlər cavabımdır. İndi yeni şeir yazacam.

“Büküm sizin ağzınızı qırxayaq kimi” şeirimi də tənqid edənlərə cavab kimi tamamlayacam.
Elza Seyidcahan hər zaman öz yerində oturub. Allah ürəyimə görə bütün qapıları üzümə açır”.

Şərh Yaz

Ad:*
Şərh:
Yağlı Əyilmiş Xətt altdan Xətt öndə | Sol tərəflə yığ Mərkəzdə Sağ tərfdə yığ | smayl qoşmaq Bağlantı qoşmaqBağlantı ilə qorunan Rəng seçimi | Gizli mətn Məqalə qoş seçilən mətni kril əlifbasına çevir Spoyler