Xətai məktəbliləri Türkiyədə Beynəlxalq Turizm Festivalında - Fotolar

Bölmə: Sosial, BLOK XƏBƏR, MANŞET

12 iyul 2017 12:42 Baxış: 221 Şərh: 0 Çap

Xətai məktəbliləri Türkiyədə Beynəlxalq Turizm Festivalında - Fotolar

Türkiyənin Mersin şəhərində 2-ci “Qız Qalası” Beynəlxalq Turizm Festivalı keçirilib. Türkiyə ilə yanaşı Litva, Şimali Kipr, Qırğızıstan, Gürcüstan, Tatarıstanın da qatıldığı festivalda Azərbaycanı Xətai rayon İcra Hakimiyyətinin təşkilatçılığı ilə bir qrup rayon məktəblisi təmsil edib.

"Xalqinfo"ya daxil olan məlumata görə, bu il Xətai rayonu ilə Mersinin Tarsus rayonunun qardaşlaşmış şəhərlər elan edilməsinin 10-cu ilidir. Ona görə də nümayəndə heyətinin bu səfəri Tarsusdan başlayıb və bir sıra görüşlər keçirilib.

Adana hava limanında qarşılanmadan sonra Xətai rayon İcra Hakimiyyəti İctimai-siyasi və humanitar məsələlər şöbəsinin müdiri Pənah İmanovun rəhbərliyi ilə Xətai bələdiyyəsinin sədr müavini Əliyar Əliyev, rayon Mədəniyyət Mərkəzinin “Səma” rəqs qrupu, rayon ərazisində fəaliyyət göstərən 287 saylı “Zəkalar” Liseyinin iki şagirdindən ibarət nümayəndə heyəti Tarsusa gələrək burada Heydər Əliyev Parkını ziyarət etdilər. Azərbaycan xalqının Ümummilli lideri Heydər Əliyevin abidəsi önünə tər çiçəklər düzüldü, dahi şəxsiyyətin xatirəsi ehtiramla yad edildi. Ulu Öndər haqqında filmə tamaşa edildikdən sonra məktəblilər parkla tanış oldular. Onlara Ulu Öndərin adını daşıyan və yerli sakinlərin ən sevimli istirahət mərkəzlərindən birinə çevrilən parkın yaranma tarixi, burada görülən əsaslı yenidənqurma işləri, hər il dahi şəxsiyyətin anadan olmasının ildönümlərində parkda keçirilən tədbirlər haqqında məlumat verildi.

Daha sonra Xətai rayonu ilə Tarsus arasındakı əməkdaşlıq əlaqələri çərçivəsində “Zəkalar” Liseyi ilə qardaşlaşan “Kampus Okulları” tədris müəssisəsində görüş keçirildi. Heydər Əliyev adına konfrans salonunda keçirilən tədbirdə məktəbin direktoru Ender Portakal Ermənistan silahlı qüvvələrinin Füzuli rayonunun Alıxanlı kəndini minaatanlardan və ağır artilleriya qurğularından atəşə tutması nəticəsində həlak olan kənd sakini Sahibə Quliyeva və onun nəvəsi 2 yaşlı Zəhra Quliyevanın, eləcə də vətən, torpaq yolunda şəhid olanların xatirəsi bir dəqiqəlik sayqı duruşu ilə yad edildi. Azərbaycan və Türkiyənin dövlət himnləri səsləndi.

Çıxış edən nümayəndə heyətinin rəhbəri Pənah İmanov göstərilən qonaqpərvərliyə görə minnətdarlığını bildirdi. Görüş məktəblilərin çıxışı və qarşılıqlı olaraq hədiyyələrin təqdim edilməsi ilə yekunlaşdı.

Daha sonra qonaqları Tarsus rayon bələdiyyəsinin sədr müavini Serab Kurtçu qəbul etdi. Tərəflər Xətai və Tarsus rayonları arasındakı əlaqələrin uğurla inkişaf etdiyini, tədris müəssisələrinin ardından iki rayonun mədəniyyət mərkəzləri arasında da əməkdaşlıq əlaqələrinin təməlinin atıldığını qeyd etdilər. Sonra “Səma” rəqs ansamblının üzvləri öz məharətlərini nümayiş etdiriblər.

İyulun 7-də “Qız Qalası” 2-ci Beynəlxalq Turizm Festivalının açılış mərasimi festival iştirakçılarının kortejinin keçidi ilə başlandı. Yerli sakinlər Azərbaycandan gələn iştirakçılara xüsusi maraq və sevgi nümayiş etdirirdilər.

Daha sonra iştirakçı ölkələrin rəqs qruplarının çıxışları oldu. Azərbaycanı təmsil edən “Səma” rəqs qrupunun çıxışı tamaşaçılar tərəfindən xüsusi rəğbətlə qarşılandı.

Festival çərçivəsində iştirakçı ölkələrin nümayəndələri, yerli dövlət nümayəndələri, millət vəkilləri, bələdiyyə üzvləri ilə keçirilən görüşlər zamanı ölkəmizin sosial-iqtisadi, ictimai-mədəni inkişafı Qarabağ həqiqətləri haqqında məlumatlar verildi, tarixi yerlərimizi, mədəniyyətimizi əks etsirən suvenirlər, eləcə də, Xocalı soyqırımının 25-illiyi ilə əlaqədar Xətai rayon İcra Hakimiyyəti tərəfindən xüsusi hazırlanmış bukletlər təqdim olundu. Görüşlər keçirilmiş insanlar arasında Mersin Valiliyi, Yenişəhər kaymakamı Mustafa Özarslan, millət vəkilləri, Baki Şimşək, Yılmaz Tezcan və başqaları da var idi.

Ölkəmizi təmsil edən iştirakçılar feslivalın bağlanışı günündə də səhnəyə çıxdılar. Bu dəfə də “Səma” rəqs qrupunun təqdim etdiyi xalq rəqsləri, Azərbaycan – Türkiyə qardaşlığına həsr olunmuş şeirlər və mahnılar tamaşaçılar tərəfindən böyük coşqu və sevgi ilə qarşılandı.

Festivalın bağlanışından sonra 10 iyul 2017-ci il tarixdə vətənə yola düşməzdən əvvəl Azərbaycanı təmsil edən Xətai rayonunun nümayəndə heyətinin Mersin Böyük Şəhər Bələdiyyəsinin binasında sədr Burhanəddin Kocamazla vida görüşü oldu. Görüş zamanı Burhanəddin Kocamaz ölkəmizi festivalda təmsil edən iştirakçılara, eləcə də bu səfərin baş tutması üçün əməyi keçən bütün insanlara, rayon İcra Hakimiyyətinin başçısı Razim Məmmədova öz minnətdarlığını bildirdi. Xətai rayon İcra Hakimiyyətinin şöbə müdiri, nümayəndə heyətinin rəhbəri Pənah İmanov göstərilən qonaqpərvərliyə və isti münasibətə görə Koçamaza, Mersin Böyükşəhər Bələdiyyəsinin bütün kollektivinə və digər təşkilatçılara minnətdarlığını bildirdi. “Zəkalar” liseyinin şagirdi Fidan Rzayeva festivalla bağlı təəssüratlarını bölüşdü, Fatimə Sadıxova Azərbaycan-Türkiyə qardaşlığını tərənnüm edən şeir söylədi.

Sonda Mersin Böyük Şəhər bələdiyyəsinin sədrinə Xətai rayon İcra Hakimiyyətinin hədiyyələri təqdim olundu.