» » Məcburi köçkünlərin kommunal borcları niyə ödənmir? -

Məcburi köçkünlərin kommunal borcları niyə ödənmir? - “Qaçqınkom” “pul yoxdur” deyir...

Bölmə: Sosial, DÜNƏNDƏN-BUGÜNƏ, GÜNDƏM
Məcburi köçkünlərin kommunal borcları niyə ödənmir? -
Azərbaycanda məcburki köçkünlərə dövlət tərəfindən ayrılan güzəştlərlə bağlı problemlər yaranıb.

Xalqİnfo.az bildirir ki, “Qafqazinfo”ya müraciət edən Ağdam rayonundan köçkün düşüb, Yasamal rayonu, Qanlı Göl ətrafında məskunlaşan Nizami Şirinov bildirib ki, artıq bir neçə aydır güzəştlərdən məhrum ediliblər.

N.Şirinov həm elektrik, həm də ev telefonlarının aylıq limitinin artıq “Qaçqınkom” tərəfindən ödənilmədiyini deyib: “Bu ərazidə təxminən 20 qaçqın ailəsi var, hər birində bu problem yaranıb. Bir neçə gün öncə bizə “ATS”dən zəng edib dedilər ki, telefonun 3 aylıq ödənişi köçürülməyib. Biz də idarəyə getdik və dedik ki, pulumuzu dövlət ödəyir. Sənədlərimizi də təqdim etdik.

İdarədən bizə dedilər ki, bu barədə məlumatlıdırlar, sadəcə “Qaçqınkom” 3 aydır ödəniş etmir. Bu gün isə bizim mobil telefonlarımıza “SMS” göndəriblər ki, ödəniş olmasa nömrələr adımızdan çıxarılacaq. Biz ödənişi etməkdən yayınmırıq, sadəcə bu məsələnin aydınlaşmasını istəyirik. Əgər dövlət ödəyəcəksə, biz təkrar niyə ödəyək? Dövlət ödəməyəcəksə, rəsmən açıqlansın, gedək özümüz ödəyək”.

N.Şirinov qeyd edib ki, eyni problem elektrik ödənişi ilə bağlı da yaranıb: “Bir-iki gün öncə “Azərişıq”dan bizə borca dair bildiriş gəldi. Mənə 297 manat, qonşulara da 300-500 manat borc yazılıb. “Azərişıq”ın Yasamal şöbəsinə getdik, onlara da eynilə dövlət tərəfindən bizə güzəşt verildiyini izah etdik. Bizə cavab verdilər ki, bu borclar 2013-2014-cü illərdən yığılıb qalıb. Belə ki, “Qaçqınkom” həmin illərdə bizim limiti ödəməyib. İdarədən bizə dedilər ki, onlar əvvəlcə “Qaçqınkom”a müraciət ediblər, lakin bu dövlət qurumu “büdcəmizdə pul yoxdur, maliyyə problemimiz var, ödəyə bilmirik” cavabını verib. Ondan sonra isə bildirişləri yazıb bizə göndəriblər”.

“Qafqazinfo” məsələ ilə bağlı “Azərişıq”a müraciət edib. Qurumun mətbuat xidmətinin rəhbəri Tanrıverdi Mustafayev saytımıza açıqlamasında bildirib ki, bu borclar həmin şəxslərin limitdən artıq sərfiyyatına görə yaranıb: “Bunlar köhnə borclar deyil, “Azərişıq” yaranadan sonra yığılan ödənişlərdi. Həmin sakinlərin limitdən artıq sərf etdiyi elektrik enerjisinə görə yazılıb. Əgər narazılıq varsa, hər bir sakin fərdi qaydada idarəyə müraciət etsin, araşdıraq və onlara borcdan nədən yarandığını izah edək”.

Qaçqınların və Məcburi Köçkünlərin İşləri Üzrə Dövlət Komitəsinin mətbuat katibi Elçin Qədimov iki gün ərzində etdiyimiz zənglərə cavab vermədiyi üçün bu qurumun məsələyə münasibətini öyrənə bilmədik.

Əlaqə üçün E-mail: Xalqinfo@mail.ru

Şəfa Rasimqızı
Xalqİnfo.az


Şərh Yaz

Ad:*
Şərh:
Yağlı Əyilmiş Xətt altdan Xətt öndə | Sol tərəflə yığ Mərkəzdə Sağ tərfdə yığ | smayl qoşmaq Bağlantı qoşmaqBağlantı ilə qorunan Rəng seçimi | Gizli mətn Məqalə qoş seçilən mətni kril əlifbasına çevir Spoyler