AMEA-nın muzeyləri sahibkarlıq fəaliyyəti ilə məşğul olacaq

Bölmə: Mədəniyyət

05 iyul 2017 17:59 Baxış: 95 Şərh: 0 Çap

Azərbaycan Milli Elmlər Akademiyası muzeylərində sahibkarlıq fəaliyyəti həyata keçiriləcək.

Xalqinfo.az xəbər verir ki, AMEA-dan Trend-ə verilən məlumata görə, Azərbaycan Milli Elmlər Akademiyası Rəyasət Heyətinin iclasında AMEA-nın muzeylərində sahibkarlıq fəaliyyətinin həyata keçirilməsi qaydaları müzakirə olunub.

Mövzu ilə bağlı çıxış edən AMEA-nın prezidenti, akademik Akif Əlizadə bildirib ki, Azərbaycan Prezidentinin 11 dekabr 2014-cü il tarixli Fərmanı ilə təsdiq edilmiş Akademiyanın nizamnaməsi və "Elm haqqında" qanunun müvafiq maddəsinə əsasən AMEA-nın elmi müəssisə və təşkilatları öz maddi-texniki bazalarını möhkəmləndirmək, əməkdaşlarının sosial-məişət şəraitini yaxşılaşdırmaq məqsədi ilə sahibkarlıq fəaliyyəti ilə məşğul ola bilərlər.

Akademik qeyd edib ki, AMEA-nın muzeylərinin sahibkarlıq fəaliyyəti həmin qurumların nizamnamələrində nəzərdə tutulmuş fəaliyyət istiqamətlərinə uyğun tənzimlənməlidir.

Rəyasət Heyəti qeyd olunanları nəzərə alaraq, "Azərbaycan Milli Elmlər Akademiyasının muzeylərinin sahibkarlıq fəaliyyətinin həyata keçirməsi Qaydası"nı təsdiq edib. Müvafiq elmi müəssisələrin rəhbərlərinə xidmətlərin bu qaydalara uyğun olaraq göstərilməsini qanunvericiliklə müəyyən edilmiş müqavilələr əsasında həyata keçirmək tapşırılıb.

Muzeylərin fəaliyyətlərinin genişləndirilməsi, maddi-texniki bazalarının möhkəmləndirilməsi və işçilərinin əməyinin stimullaşdırılması məqsədilə həyata keçirilən sahibkarlıq fəaliyyətləri bu Qaydalara edilmiş əlavələr, fiziki və hüquqi şəxslər arasında bağlanmış mülki hüquqi müqavilələr əsasında müəyyən edilir.

Leyla Həsənova

Şərh Yaz