"Şəhid övladlarına pulsuzdur, ataları ödəyib..." Azərbaycanda nümunəvi addım

Bölmə: MARAQLI, GÜNDƏM

16 fevral 2017 13:06 Baxış: 304 Şərh: 0 Çap

Xalqinfo.az xəbər verir ki, Lənkəran sakini Ramin Əkbərli, sahibi olduğu şirniyyat dükanında şəhid ailələrinə kömək etmək məqsədilə xeyriyyə aksiyası keçirir. O, Türkiyə mətbuatında bu tip xeyriyyə aksiyalarının keçirilməsi haqqında xəbərləri oxuduqdan sonra belə bir qərara gəlib.
"Torpaqlarımızın müdafiəsi uğrunda şəhid olan qardaşlarımızın xatirəsi xalqımız tərəfindən həmişə uca tutulub. Dövlət tərəfindən də şəhid ailələrinə lazımınca diqqət və qayğı göstərilir. Mən də şirniyyat məmulatları hazırlanan və satılan müəssisəmizdə şəhid qardaşlarımızın ailələrinə yardım etmək qərarına gəldim" — deyir R. Əkbərli.
Buna görə sahibkar obyektinin qapısından "Şəhid övladlarına tort məmulatları pulsuzdur, hesabları ataları tərəfindən ödənilib" elanını asıb: "Ötən ilin sonlarından bu aksiyaya start verdik. Yeni il ərəfəsində 20-yə yaxın şəhid ailəsinə tort və müxtəlif şirniyyat məmulatları hədiyyə edilib. Bu günə qədər 30-a yaxın şəhid ailəsinə yardım etdik. Yeni ildən sonra isə şəhid ailələrinə, həmçinin ərzaq və geyim hədiyyələri etmişik".

"Şəhid ailələrinə, təkcə şirniyyat və ərzaq yardımı etmirik. Şəhid övladlarının ad günü tədbirlərinin təşkili və bəzədilməsini həyata keçiririk" — həmsöhbət bildirib. Mağaza sahibi xidmətdən sui-istifadə edilməməsi üçün şəhid ailələrinin bununla bağlı müvafiq sənəd təqdim etməli olduqlarını qeyd edir. O, aksiyanın əsas məqsədini belə izah edir: "Məqsəd şəhidlər və onların ailələrinin unudulmaması, daim diqqət və qayğı görmələri və insanlarda vətənpərvərlik ruhunun artırılmasıdır".

Leyla Həsənova

Şərh Yaz