MTN polkovnikinin mayor qardaşı ifadə verdi

Bölmə: Kriminal

13 fevral 2017 16:14 Baxış: 159 Şərh: 0 Çap

Bu gün Bakı Hərbi Məhkəməsində ləğv edilmiş Milli Təhlükəsizlik Nazirliyi İstintaq Baş İdarəsi 2-ci istintaq şöbəsinin rəisi, polkovnik-leytenant Vüsal Ələkbərovun cinayət işi üzrə məhkəmə prosesi davam etdirilib.

“Qafqazinfo”nun verdiyi xəbərə görə, hakim Siyavuş Hacıyevin sədrliyi ilə keçirilən prosesdə V.Ələkbərovun qardaşı Əlvan Ələkbərov ifadə verib.

Şahid Ə.Ələkbərov bildirib ki, Daxili İşlər Nazirliyinin Hava Nəqliyyatında Polis İdarəsinin istintaq bölməsinin baş müstəntiqi, polis mayoru rütbəsində xidmət edir.

O deyib ki, 2010, ya da 2011-ci ilin yayında Vüsal ona zəng edərək Dəniz Vağzalının yanına çağırıb: “Onun dediyi kafeyə girdim, 2-3 nəfərlə oturub çay içirdi. Ləhcələrindən naxçıvanlı olduqlarını bildim. Həmin vaxt orada Hüseyn “Vinçester” silahı Vüsala verdi. Qardaşım əvvəlcə silahı götürmək istəmədi, amma çox üz vurandan sonra götürdü. Mənim maşınımın yanına gələndə Vüsala dedim bu nədi? Dedi “məcbur olub götürdüm, onlara yaxşılıq etmişəm, götürməsəm yekaxanalıq kimi çıxacaq. Yoxlayacam, ov üçün yararlı olsa istİfadə edərəm”. Sonra da gəlib silahı apardı, amma nə etdiyini bilmirəm”.

Zərərçəkən Hüseyn Səfərov isə mayorun bu sözlərinə etiraz edib və deyib ki, Vüsal Ələkbərov silahı hədə-qorxu yolu ilə alıb: “Həbs edildiyim vaxt evdə əməliyyat-axtarış tədbirlər keçirildi. Həmin zaman Vüsal evimdə silahı görüb və xoşu gəlib. Buna görə də sonra məndən silahı tələb etdi, mən də verdim”.

Bu zaman Əlvan Ələkbərov zərərçəkmişi yalan danışmaqda ittiham edib: “Qardaşım silahı götürməyəndə Hüseyn Səfərov naxçıvanlı ləhcəsi ilə dedi ki, “da bunu qəbul etməsən, bu boyda balaca şəhərdə üz-üzə gəlməyək”.

Hüseyn Səfərov qeyd edib ki, Vüsal Ələkbərov silahı ondan götürəndən sonra öz adına keçirib və həmin silahı tapmaq mümkün deyil: “Silah əvvəl mənim adıma olub. Daxili İşlər Nazirliyinə müraciət etmişəm, silahın sənədləri tapılmayıb”.

V.Ələkbərov bildirib ki, həmin silahı Hüseyn Səfərovdan hədə-qorxu yolu ilə almayıb: “Məni tanıyanlar bilir ki, ov həvəskarıyam. Hüseyn Səfərov da silahı gətirib dedi ki, mənə hədiyyə edir. Sonra silahı götürdüm və yoxladım, istifadəyə yararsız olduğu üçün dənizə atdım”.

Vüsal Ələkbərov qeyd edib ki, həmin silahı özündə saxlaması barədə heç bir məsuliyyət daşımır: “Bildiyiniz kimi mən hərbi qulluqçuyam, odlu silah saxlamaq hüququm var. Həmin silah da ov silahı olub, burada hər hansı bir cinayət məsuliyyəti yoxdur”.

Hakim isə deyib ki, qanunsuz silah saxlamaqla bağlı Vüsal Ələkbərova ittiham verilməyib.

Xalqinfo.az

Şərh Yaz