“Tağı Əhmədov Mahmudovun tələbi ilə dinlənilib” - MTN generalı

Bölmə: Kriminal, BLOK XƏBƏR, MANŞET

28 dekabr 2016 14:26 Baxış: 252 Şərh: 0 Çap

Bu gün ləğv olunmuş Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin həbsdə olan rəisi, general-mayor Akif Çovdarov, idarə rəisləri - Səlim Məmmədov, Akif Əliyev və Orxan Osmanovun cinayət işi üzrə məhkəmə prosesi davam etdirilib.

Xalqİnfo.az “Qafqazinfo”ya istinadən verdiyi xəbərə görə, Bakı Hərbi Məhkəməsinin hakimi Həbib Həsənovun sədrliyi ilə keçirilən prosesdə şahidlər ifadə verib.

A.Çovdarovun keçmiş sürücüsü Nurxan Atakişiyev təkrar ifadə verərək Tağı Əhmədovun qohumu Əli Əhmədovun yalan danışdığını deyib: “O heç üzləşmədə məni tanımadı. Deyib ki, “Land Rover”lə görüşə gəlmişik. Biz o maşını ancaq qışda istifadə edirdik, çünki Akif Çovdarov hündür maşına rahat minə bilmirdi. Heç maşının nömrəsini də düz deməyib”.

Proses iştirakçıları N.Atakişiyevdən ötən dəfəkindən fərqli olaraq bu dəfə daha rahat və geniş ifadə verməsinin səbəbini soruşublar. O bunu DTX-dan çıxarılması ilə əlaqələndirib: “Keçən dəfə çəkinəcəyim bir işim var idi, daha o da yoxdu. Burada ifadə verəndən sonra işdən çıxarıldım”.

Bundan sonra həbsdə olan general, MTN-in Monitorinq Mərkəzinin sabiq rəisi Teymur Quliyev şahid qismində ifadə verib. O bildirib ki, yalnız texniki işlər görüb: “Mənə nazirin imzası olan tapşırıqlar gəlirdi, onu da icra edirdik. Bilirdim ki, məhkəmə qərarı olmalıdır, ancaq fikirləşdirdim ki, yəqin təşəbbüskarda bu qərar var. Çünki dinlənilmə ilə bağlı təşəbbüskar sənəd hazırlayırdı, nazir də imzalayırdı. Mənim nazirin imzası olan sənədləri sorğulamaq səlahiyyətim yox idi

Tağı Əhmədovun telefonu da nazir Eldar Mahmudovun tələbi ilə dinlənilib”.

Akif Çovdarov çıxış edərək məhkəmə qərarı olmadan dinlənilmə ittihamına münasibət bildirib: “Biz polis deyildik ki, cinayət ola, ondan sonra adamı tutaq. Biz cinayətin qarşısını alırdıq. Ay ərzində 1500-3000 sorğu verirdik, onda gərək təkcə bizim işlərimiz üçün Səbail rayon məhkəməsində 20-30 hakim ayrılardı. Dəfələrlə baş prokurorun birinci müavini Rüstəm Usubov mənə zəng edib təcili olaraq sorğu verilməsini istəyib. Mən heç Usubovdan soruşmurdum ki, sizdə məhkəmə qərarı var ya yox? Şübhəli olan hər kəsi dinləyirdik”.

Məhkəmədə bildirlib ki, bu gün şahid kimi ifadə verməsi üçün məhkəmə dəvət edilən Tağı Əhmədov prosesə qatılmayıb. Ümumiyyətlə, T.Əhmədov məhkəmədən edilən telefon zənglərinə cavab vermir. O nümayəndəsi vasitəsilə məhkəməyə mesaj göndərib ki, bayramdan sonra ifadə verəcək.

Məhkəmə prosesi yanvarın 9-da davam etdiriləcək.

Əlaqə üçün E-mail: xalqinfo@mail.ru

BAKI. Şəfa Rasimqızı Xalqİnfo.az

Şərh Yaz