Baramaçılıq sahəsində dönüş olacaq

Bölmə: İqtisadiyyat

08 aprel 2017 13:20 Baxış: 170 Şərh: 0 Çap

Ötən ilin sonlarında prezident İlham Əliyev ipəkçiliyin inkişafına dövlət dəstəyi haqqında sərəncam imzalayıb. Sərəncamda qeyd olunur ki, ölkədə kənd təsərrüfatının ənənəvi sahələrindən olan ipəkçiliyin inkişafına dövlət dəstəyini gücləndirmək, bu sahənin potensial imkanlarından səmərəli istifadə etmək, rəqabət qabiliyyətini və barama istehsalı ilə bağlı əhalinin məşğulluğunu artırmaq, marağını gücləndirmək və sosial rifahını daha da yaxşılaşdırmaq məqsədilə barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi yaş baramanın hər kiloqramına görə subsidiya müəyyən edilsin. Nazirlər Kabinetinə barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi yaş baramanın hər kiloqramına görə növündən asılı olaraq veriləcək subsidiyanın məbləğini və verilmə qaydasını Azərbaycan Prezidenti ilə razılaşdırmaqla iki ay müddətində təsdiq etmək, bu sərəncamdan irəli gələn digər məsələləri həll etmək tapşırılıb.

Sərəncamdan sonra Şəkidə hansı işlər görülməkdədir? Eyni zamand, bu sərəncamın icra edilməsi ipəkçilik sahəsində hansı irəliləyişlərə səbəb olacaq?

Milli Məclisin deputatı Əli Məslimlinin sözlərinə görə, bu istiqamətdə tut bağlarının istehsalı genişlənsə,bu il daha çox barama istehsal etmək olar.

“Tut bağlarının miqyası genişlənsə, bu il daha çox barama istehsal etmək olar və ipəklə bağlı əsas sexlər ilboyu olmasa da, 6-7 ay işləyə bilər. Bu sahəyə tətbiq edilən stimullaşdırıcı tədbirlərdən sonra yaxın illərdə barama istehsalını ötən ilki göstəricidən 3-4 dəfə yüksəyə qaldırıb “Şəki İpək”ASC-in fasiləsiz işləməsini təmin etmək olar”.

Deputat bildirib ki, ötən il müəssisə 71 ton yaş barama istehsal edib.

“1 il fasilədən sonra 2016-cı ildə “Şəki İpək”ASC-də ipək istehsalı bərpa edilib. Ötən il bu müəssisə respublikanın müxtəlif rayonlarından 71 ton yaş barama tədarük edib. Tədarük edilən yaş baramanın 9700 kq və ya 14 faizi Şəki rayonunun payına düşür. Tədarük edilmiş yaş barama təxminən 4 ay müddətində “Şəki İpək”ASC əsas sexlərində istehsal prosesini təşkil etməyə imkan verdi. 490 nəfər işlə təmin olundu.İstehsal olunan barama “Şəki İpək”ASC-in ilboyu işləməsi üçün yetərli olmadığından, ipək istehsalı ilə bağlı olan şöbələr qismən fəaliyyət göstərir. Orta aylıq əmək haqqı təxminən 280 manat təşkil edir. 50 min ədədə yaxın tut tingi Şəki, Qax və Zaqatala rayonlarının İcra hakimiyyətlərinə əvəzsiz təhvil verilib”.

“Şəki İpək” ASC-nin maliyyə direktoru Müzəffər Umarov da ölkə başçısının sərəncamını yüksək qiymətləndirərək deyib ki, məhsullar xarici bazarlarda daha çox satılır.

“Sərəncamdan sonra qazanxana təsərrüfatının daha da yaxşılaşdırılması ilə bağlı işlər görülür. Həmçinin, aprel ayında Kənd Təsərrüfatı Nazirliyi tərəfindən aprel ayında barama qurdu toxumu gətirilir. Bu il də gətiriləndən sonra əsas xammal olan barama sahəsi öz işinə başlayacaq. Bu sahə ilə bağlı dövlət başçısı tərəfindən sərəncamın imzalanması iş prosesi müsbət təsir göstərir. Bu sahəni inkişaf etdirməliyik. Məhsullarımız əsasən ixrac potensialına malikdir. Daxili bazarda məhsullarımızın satışını çox az həyata keçiririk”.

Şərh Yaz