İran Kiş adasında dəbdəbəli turizm obyektləri açır - Fotolar

Bölmə: İqtisadiyyat

02 aprel 2017 14:50 Baxış: 1199 Şərh: 0 Çap

İran İslam Respublikası Yaxın Şərqdə Dubay və Şarm əl-Şeyxin turizm imkanlarına sahib çıxmağa iddia edir.

Xalqinfo.az xarici mediaya istinadən xəbər verir ki, Azərbaycanın cənub qonşusu olan İran dövləti Bəsrə körfəzindəki Kiş adasında dəbdəbəli turizm obyektləri açır.

Yaxın Şərqdə Şarm əl-Şeyx və Dubaydan sonra turistlərin diqqətini çəkən üçüncü ən böyük turizm məkanı sayılan Kiş adası yaxın illərdə İranın ən böyük gəlir gətirən məkanına çevrilə bilər.

Bu adada istirahət edən insanların həyat tərzi İranın digər bölgələrindən çox fərqlənir. Hətta, Kiş adasında istirahət edən turistləri açıq-saçıq və çimərlik geyimində də görmək mümkündür. Ona görə də Kiş adası Dubay və ya digər turizm bölgələrinə çox bənzəyir.

İran hökuməti bu adanı yaxın illərdə bölgənin ən populyar turizm mərkəzinə çevirmək istəyir. Adada dəbdəbəli otellər və villalar inşa edilir, turistlərin diqqətini cəlb edən infrastruktur yaradılır.

Adada qiymətlər münasib olduğu üçün, dünyanın hər yerindən bura gələn turistlər görmək mümkündür. İranın varlı təbəqəsi artıq Kiş adasında istirahət etməyi adət halına gətirib. Ona görə də adada İranın varlı ailələri ilə tez-tez rastlaşmaq olar.

Qeyd edək ki, 26 min əhalisi olan Kiş adası İranın Hörmüz vilayətinə bağlıdır. Hazırda bu adaya ildə təqribən 1 milyondan çox turist gəlir.