Azərbaycanın bədii gimnastika üzrə yığması İslamiadanın qalibi olub

Bölmə: Idman

13 may 2017 22:01 Baxış: 191 Şərh: 0 Çap

Azərbaycanın bədii gimnastika üzrə yığması İslamiadanın qalibi olub

Bu gün İslam Həmrəyliyi Oyunlarında bədii gimnastika yarışlarında ilk mükafatçılar müəyyənləşib.

Xalqinfo.az Apasport.az-a istinadən məlumatına görə, Milli Gimnastika Arenasında təşkil olunan yarışın ikinci günündə komanda hesabında ən yaxşılar bəlli olub.

Marina Durunda, Jalə Piriyeva və Zöhrə Ağamirovadan ibarət Azərbaycan yığması çempion tituluna yiyələnib. 4 hərəkətin cəmində 128,200 xal toplayan gimnastlarımız ən yaxın izləyiciləri olan Özbəkistanı 4,350 xal qabaqlayıblar. Hakimlərin 101,650 xalla qiymətləndirdiyi Türkiyə isə ilk “üçlüy”ü qapayıb.

Komanda yarışları ilə yanaşı, şəxsi birincilikdə iki hərəkətdə təsnifat mərhələsi də keçirilib. Gimnastlar gürzlər və lentlə xalça üzərinə çıxıblar.

Azərbaycanı bu yarışda üç idmançı təmsil edib. Gürzlə 15,600 xal yığan Marina Durunda və 16,050 xala malik Jalə Piriyeva bu hərəkətdə finala vəsiqə qazanıb.

Lentlə hərəkətlərdə də Durunda və Piriyeva həlledici mərhələyə yüksəlib. Onlar müvafiq olaraq, 15,200 və 16,100 xal toplayıblar.

Zöhrə Ağamirova isə mübarizəni dayandırıb.

Qeyd edək ki, ayrı-ayrı hərəkətlərdə final mərhələsi sabah keçiriləcək. Durunda ilə Piriyeva halqa və topla hərəkətlərdə də final mərhələsinə qatılacaq.

Leyla Həsənova

Şərh Yaz