Dilqəmin atasının səhhəti ağırlaşdı - “Bütün gün onu çağırır…”

Bölmə: GÜNDƏM

18 yanvar 2017 14:33 Baxış: 217 Şərh: 0 Çap

Artıq 3 ildir ki, erməni girovluğunda saxlanılan Dilqəm Əsgərovun atası Qardaşxan Əsgərovun səhhəti ağırlaşıb.

Bu haqda Modern.az-a D.Əsgərovun oğlu Kürdoğlu Əsgərov məlumat verib:

“10 gün olardı ki, babam gecə-gündüz yatmırdı. Bütün günü atamın adını çəkirdi. 82 yaşlı qoca kişidir. Evdən çölə çıxanda iflic olub. Bir tərəfi işləmirdi, dili tutulmuşdu”.

K.Əsgərov bildirib ki, hazırda babası müalicə alır:

“Şəmkirdəki evində, yataq rejimində müalicəsini davam etdiririk. 4 günlük müalicədən sonra şükür, yaxşıdır, dili açıldı. Bütün gün yenə də atamı çağırır”.

O, həmçinin qeyd edib ki, yanvar ayı ərzində atasından məktub almayıb:

“Sonuncu dəfə ötən ilin dekabrda məlumat almışıq. Qırmızı Xaç Komitəsi tərəfindən atama göndərmək üçün yeni məktub yazılması lazım olduğunu bildirməyiblər. Məktub yazanda belə, atama babamın vəziyyəti barədə yazmağı düşünmürəm. Çünki onun üçün belə xəbər eşitmək ağır olar”.

2014-cü il iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

İşğal altındakı Dağlıq Qarabağda D. Əsgərov və Ş. Quliyev üzərində “məhkəmə” qurulub. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilib.

Əlaqə üçün E-mail: xalqinfo@mail.ru

BAKI. Şəfa Rasimqızı Xalqİnfo.az

Şərh Yaz