Paşinyan Ermənistan dövləti adından üzr istədi
1-03-2019, 14:46. Yerləşdirdi: sefa
Ermənistan baş naziri Nikol Paşinyan 2008-ci il 1 mart hadisələrinə görə dövlətin adından xalqdan üzr istəyib.
Xalqinfo.az-ın “tert.am” saytına istinadən xəbərinə görə, Paşinyan bildirib ki, o dövrün hakim elitasının hərəkətləri ayrıca olaraq fərdi qüvvələrə, qruplara və insanlara qarşı yönəlməyib.
“Bu şiddətin əsas hədəfi Ermənistan vətəndaşı, onun hüququ, azadlığı olub. Ermənistan bundan sonra heç bir zaman korrupsiya, siyasi zülm, siyasi zorakılıq və hüquqların pozulduğu dövrə qayıtmayacaq. Mən hakim elitanın qanunsuz şəkildə saxtalaşdırdığı seçki nəticələrinə, siyasi qətllərə görə hər kəsdən üzr istəyirəm”.
Xatırladaq ki, 2008-ci il fevralın 19-də keçirilən prezident seçkilərindən sonra Ermənistanın ilk prezidenti Levon Ter-Petrosyanın rəhbərlik etdiyi blokun tərəfdarları seçki nəticələrinin yenidən nəzərdən keçirilməsi tələbi ilə Azadlıq meydanında toplaşıblar. 10 gün sərasər minlərlə insan meydanı tərk etmədən bütün sutka davam edən nümayişlərdə iştirak ediblər. Onlar bildirirdilər ki, seçki zamanı əslində hazırkı prezident Serj Sarkisyan yox, Levon Ter-Petrosyan qalib gəlib. Konstitusiya Məhkəməsi isə o zaman seçkiləri qanuni olaraq tanıdığını, Sarkisyanın 52,86 faiz səs, Levon Ter-Petrosyanın isə 21,5 faiz səs topladığını açıqlamışdı.
Bundan sonra martın 1-də səhər erkəndən etiraz aksiyası iştirakçıları zorla Azadlıq meydanından dağıdılıb. Daha sonra şəhərin digər hissəsində – Myasnikyan abidəsinin yaxınlığında 10 nümayişçi öldürülüb. Hadisə nəticəsində 200-dən çox insan yaralanıb.
Geri qayıt